Gabatarwa
Tambayar “shin akwai hanyoyin ƙara girman azzakari?” na daga cikin tambayoyin da ake yawan nema a Google, musamman a Najeriya. Tallace-tallace a intanet na magungunan gargajiya, ganyeyyaki, man shafawa, motsa jiki, da na’urori suna yawan yin alƙawarin ƙarin tsawo ko kauri cikin kankanin lokaci. Amma menene gaskiyar kimiyyar likitanci a wannan babin? Wannan rubutu zai ba ka amsa cikin ilmi, gaskiya, da lafiyar jiki, ba tare da ruɗu ko ƙarya ba.
> Taƙaitaccen sako: A likitancin zamani, babu wata hanya mai sauƙi, lafiyayya, kuma tabbatacciya da ke ƙara girman azzakari sosai ga maza masu lafiya. Abin da ya fi muhimmanci shi ne lafiyar azzakari da aiki, ba girma kawai ba.
Me yasa wannan batu yake jan hankali a. Intanet?
- Kwatantawa da abin da ake gani a intanet ko fina-finan batsa
- Damuwa da gamsar da aure
- Tallace tallace da ke cike da romon baka da alƙawari ba tare da hujja ba
- Rashin sanin menene lafiyayyen girman azzakari na al’ada a likitance
Wadannan dalilai kan sa mutum ya ji kamar nashi bai isa ba, alhali a yawancin lokuta ba gaskiya ba ne.
Rubutu Mai Alaka: Me Yake Kawo Jin Zafin Azzakari Bayan Saduwa?
Menene girman azzakari na al’ada a likitance?
Ba'a yanke hukunci kan girma da tsayin azzakarin namiji, ta abin da ake iya gani da ido, musamman ga namijin da bai taɓa aure ba ko wanda bai ma taɓa keɓewa da mace ba. Ga bayani takaitacce game da girman azzakari na al’ada bisa binciken likitanci:
1. Lokacin da azzakari yake kwance (flaccid)
Matsakaicin girma: 7–10 cm (kimanin 2.8–4 inci)
Zai iya zama ƙasa ko sama da haka, amma kuma duk ba matsala bane.
2. Lokacin da azzakari ya mike (erect)
Matsakaici: 12–16 cm (kimanin 4.7–6.3 inci)
Ƙari ko ƙasa da wannan yana iya kasancewa ba matsala ba har yanzu.
Abun lura: Yawancin maza sun fi damuwa da yadda suke ji fiye da girman su a zahiri.
Bambanci tsakanin ire-iren azzakari guda biyu “grower” da “shower”:
Grower: ƙarami ne idan yana kwance, amma yana ƙaruwa sosai idan ya miƙe
Shower: kusan tsawo daya ne a lokacin da yake kwance da kuma idan ya miƙe. Idan ya mike kawai yana kara tauri ne da karfi.
Muhimmin abin lura: lafiyar tsayuwa (erection), jin daɗi, da amincewa da kai sun fi tsawo ko kauri muhimmanci wajen rayuwar aure.
Rubutu Mai Alaka: Ire-iren Azzakari Da Sahihan Bayanai Akan Azzakarin Namiji
Menene matsayar kimiyya game da tallace tallacen maganin kara girman azzakari?
1) Magunguna, kwayoyi, man shafawa, da ganye na kara girman azzakari
❌ Ba su da hujjar kimiyya.
Babu magani (na asibiti ko gargajiya) da aka tabbatar yana ƙara girman azzakari na dindindin ga maza masu lafiya. Wasu na iya:
- Haifar da illa
- Yin hulɗa da wasu magungun
- Jawo matsalar hawan jini ko bugun zuciya
> Gargadi: Kada a yarda da talla kawai; nemi hujjar binciken likitoci.
2) Motsa jiki na kara girman azzakari (misali: jelqing)
⚠️ Ba a tabbatar da ingancinsa ba, kuma yana da haɗari.
Jelqing motsa jiki ne da ake jan azzakari don ƙara shigar jini a cikin sa. Abin da wasu ke gani yawanci canji ne na ɗan lokaci. Likitoci suna gargadi sosai akan yin haka saboda yana iya:
- Jawo rauni ko kumburin azzakari
- Lalata jijiyoyin azzakari
- Mutuwar azzakari
- Haddasa matsalar mikewar sa a nan gaba
3) Na’urorin jan azzakari (penis extenders)
🟡 A wasu, bincike ya nuna, ana iya samun ƙarin tsawo kaɗan (kimanin 1–2 cm) idan an yi amfani da su tsawon watanni kuma a karkashin kulawar likita. Sai dai ba su ƙara kauri sosai
4) Tiyata
🟢 Ita ce kaɗai hanyar da ilmin likitanci ya yarda tana iya canza girma a wasu matsaloli na musamman, amma, ana iya yin ta ne kawai idan akwai rashin lafiya na gaske. Saboda tana da haɗari da illa, ba a yawan ba da shawara ga mutumin da ke da lafiyayyen azzakari.
Abin da likitoci suka fi ba da shawara game da girman azzakari
1) Kula da lafiyar jiki gaba ɗaya
- Cin abinci mai kyau
- Motsa jiki akai-akai
- Isasshen barci
2) Gujewa abubuwan da ke lalata mikewar azzakari
- Shan taba
- Yawan shan barasa
- Miyagun ƙwayoyi
3) Duba matsala idan tana akwai
Idan kana da:
- Raunin tsayuwa ko rashin mikewar sa
- Daukewar sha’awa
- Zafi ko rauni
➡️ Ganin likita ya fi amfani fiye da neman ƙarin girma.
Me yasa tallan maganin karin girman azzakari na ƙarya ke yawaita?
Rashin ka’idoji a intanet
Tsoron mutane da damuwa
Alƙawari mai sauƙi kan matsala mai rikitarwa
> Ka lura da kyau: abin da ya yi kama da “magani mai sauri” yawanci tallar karya ce.
Rubutu Mai Alaka: Illolin Maganin Ƙarfin Maza: Abin da Ya Kamata Kowane Namiji Ya Sani
Tambayoyi da ake yawan yi (FAQ)
Shin akwai wata hanya ta halitta da ke ƙara girma?
A’a. Babu hanyar halitta da aka tabbatar tana ƙara girman azzakari na dindindin ga maza masu lafiya.
Me ya fi muhimmanci: girma ko aiki?
Aiki da lafiya sun fi muhimmanci sosai.
Na’urorin jan azzakari suna da amfani?
A wasu lokuta, ƙarin tsawo kaɗan na iya samu, amma karkashin kulawar likita kuma amfanin yana da iyaka.
Tiyata domin kara girman azzakari fa?
Ana yin ta ne kawai idan akwai wata rashin lafiya ta musamman da ta hana girman azzakari, kuma tana da haɗari.
Shin akwai wata hanya da aka tabbatar ta kimiyya da take ƙara girman azzakari?
A yanzu, babu wata hanya da aka tabbatar ta kimiyya wadda take ƙara girman azzakari mai lafiya ga maza da ba su da wata matsala (misali micropenis). Binciken likita ya nuna cewa mafi yawancin hanyoyi da ake tallatawa ba su da tasiri kuma suna iya zama masu haɗari.
Shin jelqing ko motsa jiki yana ƙara girman azzakari?
Jelqing wata hanyar motsa jiki ce da ake yi da hannu da nufin ƙarfafa shigar jini a cikin azzakari domin kara girman sa. Babu shaidar kimiyya da ta tabbatar cewa yana ƙara girman azzakari na dindindin, kuma yana iya haifar da rauni, kumburi ko matsala ta miƙewar azzakari a nan gaba.
Shin allurai, man shafawa ko ƙwayoyi na iya ƙara girman azzakari?
Yawancin piloli, man shafawa, da allurai da ake tallatawa ba su da hujjar kiwon lafiya da aka tabbatar. Wasu suna ƙunshe da sinadaran da ba'a sani ba kuma basu da inganci ko kadan .
Shin akwai na’urar da za ta yi aikin ƙara girman azzakari?
Wasu na’urori kamar penile traction devices (extenders) sun nuna a wasu ƙananan bincike cewa suna iya ƙara tsawo da kimanin 1–3 cm idan an yi amfani da su tsawon lokaci sosai, amma hakan na buƙatar kulawar likita kuma ba shi da tabbacin sakamako mai kyau.
Shin tiyata na iya ƙara girman azzakari?
Tiyata na iya canza wasu sassa ko bayyanarsa, amma ba a ba da shawarar yin tiyata kawai don ƙara girma saboda tana da haɗari da illa, kuma yawanci ana yin ta ne ne kawai idan akwai matsala ta gaske.
Shin tsawon azzakari yana da tasiri a gamsuwar jima’i?
Gamsuwar jima’i ba kawai ta dogara ga girman azzakari ba. Akwai abubuwa da dama kamar lafiyar tsayuwar sa, fahimtar bukatar abokin saduwa, ƙwarewa, da kwanciyar hankali da suka fi tasiri. Maƙasudin likitoci shi ne inganta lafiya da aiki, ba kawai ƙara girma ba.
Me ya kamata in yi idan ina damuwa game da girman azzakari na?
Idan kana damuwa:
- Ka yi magana da likita ko ƙwararren lafiya don tantance halin da kake ciki.
- Neman shawarar kwararru zai taimaka wajen rage damuwa da kwatantawa.
- Kula da lafiyar jiki gaba ɗaya na iya inganta aikin jima’i da kwanciyar hankali.
Shin ina cikin koshin lafiya idan azzakarina bai yi tsawo sosai ba lokacin da yake a kwance?
A cikin mafi yawancin maza, tsawon azzakari a lokacin da yake kwance baya nuna girma ko ƙanƙantar azzakarin, sai dai tsawon sa a lokacin da ya mike tsaye (erect) shine abin da ya fi muhimmanci. Yawancin maza suna cikin matsakaicin girma kuma basu da matsala ta rashin lafiya.
Shin rage kiba ko rama na iya sa azzakari ya yi kama da yana da girma?
Eh, a wasu mutane. Kitsen da ke taruwa a ƙasan ciki na iya ɓoye wani ɓangare na azzakari. Rage kiba na iya sa ya fito fili sosai, amma ba yana nufin girman ya ƙaru ba.
Shin tsayin azzakari yana da alaƙa da tsayin mutum ko girman ƙafarsa?
A’a. Babu wata hujjar kimiyya da ke nuna alaƙa kai tsaye tsakanin tsayin mutum, girman ƙafa, ko hanci da girman azzakari.
Shin hormones (testosterone) na iya ƙara girman azzakari?
Hormone na iya shafar girman azzakari kafin balaga (puberty). Amma ga manya, ƙara testosterone ba ya ƙara girman azzakari, sai dai idan akwai matsalar hormone ta musamman da likita ya gano ta hanawq azzakarin girma.
Shin shan magungunan ƙara ƙarfin mazakuta (kamar Viagra) yana ƙara girma?
A’a. Waɗannan magunguna ba sa ƙara girma, suna taimakawa ne kawai wajen ƙara jini ya shiga azzakari domin miƙewa da tsayuwa mai ƙarfi.
Shin azzakari na iya ƙara girma bayan aure ko yawan jima’i?
A’a. Yawan jima’i ko aure ba sa ƙara girman azzakari. Abin da zai iya canzawa shi ne ƙwarewa, jin daɗi, da amincewa da kai.
Shin akwai bambanci tsakanin ire-iren azzakari “grower” da “shower”?
Eh.
Grower: ƙarami ne idan ba ya tsaye, amma yana ƙaruwa sosai idan ya miƙe. Shower: yana da girma ko da ba ya tsaye, kuma idan ya miƙe ma baya wani kara girma. Dukkan su ba matsala ba ne.
Shin yawan damuwa da tunani na iya sa mutum ya ji azzakarinsa ya yi ƙanƙanta?
Eh. Damuwa, fargaba, da kwatantawa na iya sa mutum ya raina kansa, alhali a zahiri girman sa baida matsalar komai.
Shin akwai abinci da ke ƙara girman azzakari?
A’a. Babu abinci da ke ƙara girman azzakari kai tsaye. Amma abinci mai kyau na iya inganta jini, ƙarfi, da tsayuwar azzakari.
Yaushe ne ya dace mutum ya ga likita game da girman azzakari?
- Azzakari ya yi ƙanƙanta ƙwarai tun daga ƙuruciya
- Akwai rauni, zafi, ko nakasa
- Akwai matsalar rashin mikewa mai tsanani
➡️ A waɗannan lokuta, ganin likita yana da muhimmanci.
Shin yawancin maza suna jin nasu bai isa ba?
Eh. Bincike ya nuna cewa mafi yawan maza suna tunanin azzakarinsu ya yi ƙanƙanta, alhali suna cikin girma na al’ada a likitance.
Shin hotuna da bidiyon batsa a intanet suna nuna girma na gaskiya?
A’a. Yawanci ana amfani da:
Gyaran hoto (editing)
Zaɓen mutane na musamman masu girman azzakari sosai
Wannan na haifar da ruɗani da kwatantawa mara kyau.
Mene ne abu mafi muhimmanci ga jin daɗin aure: girma ko aiki?
Aiki, lafiya, da fahimtar juna sun fi girma da muhimmanci sosai. Likitoci sun jaddada cewa girma kaɗai ba shi ne mabuɗin gamsuwa ba.
Kammalawa
Amsar kimiyya a bayyane take: ba a tabbatar da wata hanya mai sauƙi, lafiyayya, kuma tabbatacciya da ke ƙara girman azzakari sosai ga maza masu lafiya ba. Abin da ya fi muhimmanci shi ne lafiya, aiki, da amincewa da kai. Kada ka bari talla ko kwatantawa su sa ka ɗauki matakin da zai cutar da lafiyarka.
Idan kana neman inganta lafiya da ƙarfi cikin aminci, ko kana da wata matsala ta rashin lafiya, ganin ƙwararren likita shi ne mafi dacewa.
No comments:
Post a Comment