Gabatarwa
Basir mai tsiro wanda ake kira da "hemorrhoids" ko kuma "piles" a turanci, lalura ce da ke ci gaba da shan gurguwar fahimta a tsakanin al'ummar Hausawa.
Ba wani abu ne ake kira basir mai tsiro ba face kumburar jijiyoyin jini a cikin ƙarshen babban hanji da kuma dubura.
Waɗannan jijiyoyin jini da suka kumbura su ne suke talewa har su yi bulli cikin ƙarshen babban hanji ko kewayen dubura. Basir a cikin ƙarshen babban hanji shi ne "basir ciki wanda aka fi sani da internal hemorrhoid a turance," yayin da shi kuma basir a kewayen dubura shi ne "basir na waje ko kuma external hemorrhoid a turance"(1).
Haka nan, "basir mai tsiro" ci gaban "basir cikin dubura" ne wanda ke bayyana yayin da matsalar ta je matakin ƙarshe. "Basir mai tsiro" na faruwa ne sakamakon zazzagowa ko saukowar jijiyoyin jinin da suka yi kumbura sukayi bulli zuwa wajen dubura, musamman yayin yunƙuri(1).
Alamomin Basir
Bayyanar alamomin basir ya danganta ga wane irin basir ne ya bayyana, "basir cikin dubura" ko kuma "basir a wajen dubura".
Alamomin basir na cikin dubura
1. Zubar jini ba tare da jin ciwo ba yayin bahaya
2. Basir mai tsiro wanda ke fitowa wajen dubura har sai an tura da yatsa domin mayar da shi. Yana haifar da ciwo da raɗaɗi da kuma zubar jini(2).
Alamomin basir wajen dubura
1. Ciwo mai raɗaɗi
2. Ƙaiƙayi
3. Kumburi a kewayen dubura
4. Zubar jini yayin bahaya.
Me ke kawo basir?
Har ila wayau masana ilmin kimiyya basu gane takamaiman abinda ke kawo basir ko dankanoma ba, amma duk da haka ana alakanta shi da gado da kuma wasu abubuwa(2).
Basir na faruwa sakamakon takurar jijiyoyin jini a dubura wanda zai sa har su kumbura sannan su yi bulli saboda abubuwa kamar haka:
1. Yawan yunƙuri lokacin bahaya.
2. Tsawaitar lokacin bahaya.
3. Fama da atini ko kuma
4. Yawan yin bahaya mai tauri na tsawon lokaci.
5. Kasancewa mai Ƙiba ko kuma teɓa.
6. Kasancewa mai juna biyu.
7. Cin abincin mai ƙarancin sinadarin fiber, harza ko ganyayyaki.
8. Ɗaga kayan nauyi akai-akai, kamar masu yawan gymming da 'yan dako
9. Yawan haihuwa
Hanyoyin Kiyaye Basir ko Dankanoma Mai Tsiro Cikin Sauƙi
Hanya mafi kyau wajen kiyaye kai daga basir ita ce sanya bayan gida ya zamo mai taushi yadda zai iya ficewa ba tare da yunƙuri sosai ba.
Waɗannan hanyoyi za su taimaka wajen kiyaye kai daga basir ko dankanoma da kuma rage matsalolinsa(2):
1. Cin abinci mai sinadaran fiber sosai: Abinci mai sinadaran fiber sun haɗa da 'ya'yan itatuwa, ganyayyaki da kuma tsabar hatsi.
2. Shan isasshen abin sha: Shan isasshen ruwa aƙalla lita biyu zuwa uku kowace rana da sauran ababen sha masu ruwa-ruwa kamar su kankana, lemu mai bawo, ayaba da dai sauransu.
3. Rage yunƙuri yayin bahaya: Yunƙuri tare da riƙe numfashi yayin bahaya na takura jijiyoyin jini a cikin babban hanji da dubura.
4. Garzayawa da zarar an ji bayan gida: Yin biris da bayan gida ko yawan riƙe bayan gida na wani lokaci yayin da aka ji shi na janyo bayan gida yayi tauri, saboda hanji zai ci gaba da tsotse ruwan bayan gidan har ya sanya shi tauri.
5. Kula da yin atisaye: Atisaye ko motsa jiki na taimakawa rage taurin bayan gida. Haka nan, atisaye na taimakawa wajen rage ƙiba wanda hakan zai rage nauyi ko takura ga jijiyoyin jini a cikin dubura.
6. Kaucewa dogon zama ko tsugunni: Dogon zama musamman yayin bahaya na ƙara takura jijiyoyin jini a dubura.
Kammalawa
Basir ko dankanoma larura ce da ake iya samun waraka bayan amfani da magunguna da sauran hanyoyin asibiti. Amma idan basir mai tsiro ya yi tsanani yin tiyata na iya zama tilas. Domin sanin yadda ake maganin basir ko dankanoma mai tsiro, ku karanta rubutun da mukayi wanda shi ne bakandamiya game da yadda ake maganin basir a asibiti. https://www.lafiyata.com.ng/2022/12/alamomin-dan-kanomabasir-mai-tsiro-da.html?m=1 Rubuta ne da ba zaku samu irin sa ba a yanar gizo.
Yana da kyau a tuntuɓi likita da zarar alamomin basir sun bayyana a gareka maimakon shan magungunan gargajiya da ba ka da tabbacin ingancin su.
Idan mai kuna da tambaya sai kuyi a cikin akwatin sharhi dake ƙasa, Insha Allah zamu karba ba tare da jinkiri ba. Haka kuma zaku iya shiga group dinmu na WhatsApp domin kasancewa damu damu a koda yaushe da kuma samun ingantattun bayanan mu a cikin sauki. Ku danna wannan domin shiga: Lafiyata Group 3.
.png "Instagram")
0 Comments