Me Ke Kawo Ciwon Nono A Lokacin Jinin Al'ada (Period)?

Salam Dr. Mi ke sa idan mace zatayi period sai nonon ta sukama ciwo, nagode kuma some times ko ba period zatayiba in anka taba tana jin ciwo sosai

Amsa 

Irin wannan ciwon nono yana faruwa ne ga mata a lokutan da sinadaran sex hormones dinsu (oestrogens da progesterone) su ke hauhawa ko kuma suke a halin rashin daidaituwa. Normally sunfi samun irin wannan ciwon a lokuta 3 kamar haka:

• 1. Lokacin da suke yin al'ada 
• 2. Lokacin da suke yin ovulation, wannan yana faruwa kamar kwanaki 10 ko sha biyu bayan al'adar su ya dauke
• 3. Lokacin da suke da ɗanyen ciki.

Haka kuma suna iya samun irin wannan ciwon a lokacin da suke shayarwa, da kuma kananan yara a lokacin da suke tashen balaga da kuma tsofaffi a lokacin aladan su ya kusan ɗaukewa. Duka irin wadannan matan suna samun hormonal imbalances wanda shi ne zai kawo musu wannan ciwon.

A irin wannan ciwon ba abu ne mai buƙatar magani ba, saboda yakan zo ya wuce daga zarar hormones na mace sun daidaita. Amma wasu matan yakan takura su har ya hana su sukuni, wasu kuma yakan shafi mu'amalar su ta aure tsakanin su da mazajen su. 

Saboda haka, matan da suka kasa jurewa ana basu simple pain relievers; kamar irin paracetamol, diclofenac ko ibuprofen.

Haka kuma ana basu shawarar yin amfani da rigar nono dake kame jikinsu da kyau. Bugu da kari, zasu iya gashi da ruwan zafi ko abu mai ɗimi haka.

A wani lokaci ana ba mata magungunan bada tazarar iyali masu ɗauke da sinadaran sex hormones na mata (Estrogen da Progesterone) domin daidaita musu sinadaran. Amma kuma wani bincike ya nuna cewa su ma wadannan magungunan suna iya kawowa mace irin wannan ciwon nonon ta hanyar barkata musu sinadaran.

A lura cewa, dole sai an tabbatar da cewa nonon ba wani ƙololo, ƙurji, ko tsiro a cikinsa kamin a alaƙanta ciwon nonon da abubuwan da muka lissafa a sama.

Slm. Dr anwuni lfy ya aiki. Naga wani bayani dakayi akan axilla tun 2023 kan kaikayin hammata da gaban mace. Dr inaso na tambaye ka ne Ni nono kemin ciwo naje nayi mammogram an ce ba cancer sai dai axilla nayi scanning bansan adadinsaba Banda wani hoto Kuma danayi wllh anbani magani nasha Amma haryanzu wllh ciwo nonon sukemin Kuma indai zanyi scanning ko wani test za acemin axillary ne a result Dan Allah Dr kamin bayanin gameda axillary dinnan Dan hankalina bakaramin tashi yakeyiba game da ciwonda nonona kemin harda hannu Kuma Babu wani kulku ko kumburi iya ciwonne da nono 1 kemin Amma yanzu duka biyu hannuwa sudungayin minjirya suna suka da ciwo Dr inashan wahala shekara kusan 4 kenan.

Amsa

Axillary yana nufin wani yanki ne a ƙarƙashin hammatarki, wato kusa da nononki, kuma akwai manyan jijiyoyin jini a wurin waɗanda suke haduwa da tsokokin wurin su zamo kaluluwa (lymph nodes). 

Ita kuwa kaluluwa wata jaka ce wacce take tattare kwayoyin cututtuka idan suka shiga jikinki domin ta hana su watsuwa zuwa sauran sassan jikinki. Don haka kaluluwa ba cuta bace, tana taimakawa jikinki ne wajen rage watsuwar kwayoyin cuta a cikinsa.

Saboda haka idan sakamakon awon mammogram scan dinki ya nuna 'axillary pain" ko "axillary inflammation", to, yana nufin cewa akwai kumburin kaluluwa ne a wajen hammatarki. 

Ma'ana, ba yana nufin cewa kinada ciwon cancer na nono ne ba. Yana nufin cewa garkuwar jikinki tana kokarin yaki da kwayoyin cututtukan da suka shiga jikin ki ne (lymphadenopathy).

Jin ciwo a nononki ba tare da kumburi ko zubar ruwan nono ba yana iya zamowa saboda zafin kaluluwar ne yake kaiwa zuwa ga nononki (referral pain), amma sai kiyi kuskuren yin tsammanin cewa nononki ne yake yi miki ciwo. 

A gaskiya binciken da akayi ya nuna cewa nonuwanki lafiya lau suke. Idan ma har akwai wani abu, to, bazai wuce ciccikowar su ba (mastitis), sakamakon sauye-sauyen zubar ruwan sinadaran estrogen da progesterone (hormonal changes) a cikin jikinki. Wannan kuwa ba bakon abu ba ne ga dukkan wata mace.

Za'a iya magance kaluluwarki wacce take sanya miki jin zafin nono da hannuwanki ne ta hanyar yin amfani da magungunan antibiotics ko antiviral ko antifungal idan aka gano ainihin kwayoyin cutar da suke haddasa miki kaluluwar. 

Sannan zaki iya gasa hammatarki da nonuwanki da ruwan dumi (warm compress) safe da yamma, ko kuma yin wanka da ruwan dumi. Bayan haka, ki rika motsa hannuwanki, samun isasshen hutu, shan maganin kashe radadi, tareda yawaita shan ruwa.

WalLahu A'lam