Gabatarwa:

Shin kina tsammanin kina da ciki? Ko kina jin wasu alamomin shigar ciki, ko kawai kina so ki san ya mace take gane tanada ciki ne? Haƙiƙanin gaskiya tabbatar da cewa mace tanada ciki sai anyi gwajin ciki. Amma kafin ayi gwajin ciki akwai wasu alamomin shigar ciki da idan mace ta fara jin su, toh, suna ƙara ƙarfafa mata gwiwa da kuma kyautata mata zaton lallai tanada ciki.

Yawancin waɗannan alamomin shigar ciki ba su keɓanta ga shigar ciki kaɗai ba. Wasu na iya nuna cewa rashin lafiya yana batun kama mace ko kuma jinin hailar ta ya kusa farawa. Haka kuma, wata mace za ta iya samun ciki ba tare da fuskantar yawancin waɗannan alamomin shigar ciki ba.

Alamomin shigar ciki a jikin mace

Manya-manyan alamomin shigar ciki na farko da kan iya nuna mace ta ɗauki ciki sune kamar haka;

1. Rashin zuwan jinin al'ada

Idan mace na cikin shekarun haihuwa kuma mako daya ko fiye ya wuce ba tare da ta ga jinin hailar da take tsammani ba, zai iya yiwuwa ta samu ciki. Wannan ita ce babbar alamar daukar ciki, amma duk da haka, wannan alamar na iya zama mai rikitarwa idan dama mace na fama da jinin haila mai wasa.

2. Kumburin nono da ciwo kaɗan idan an taɓa

Rashin daidaituwar sinadaran hormones a farkon shigar ciki na iya sa nonuwan mace su kumbura, su ƙara jin taɓi kuma su zamana suna ciwo kaɗan idan an taɓa. Jikin mace zai saba da wannan canje-canjen sinadaran bayan cikin ya fara girma, don haka, nonuwan mace zasu daina ciwon.

3. Yawan tashin zuciya ko amai

Yawan tashin zuciya a farkon shigar ciki yana daga cikin alamomin shigar ciki a satin farko, ana kiran irin wannan amai, aman laulayi, ko kuma morning sickness da turanci saboda yafi faruwa da safe. Toh amma zai iya faruwa a kowane lokaci na yini ko dare, sau da yawa yana farawa cikin wata ɗaya zuwa biyu bayan mace ta sami ciki.

Duk da cewa, mafiyawanci mata suna jin yawan tashin zuciya a farkon shigar ciki amma wasu kuma ba su taɓa samun tashin zuciya a lokacin da suke da ciki. Wasu kuma suna samun matsanancin laulayi da zai kai har a kwantar da su a asibiti.

4. Yawan fitsari

Mace zata iya samun kanta tana yawan fitsari fiye da yadda ta saba. Wannan ya samo asali ne saboda yawan jini a jikin mace yana ƙaruwa lokacin da ta dauki ciki, hakan yana haifar da kodar mace ta tace fitsari mai yawa.

5. Kasala da yawan gajiya

Yawan gajiya yana ɗaya daga cikin manyan-manyan alamomin shigar ciki. Bayan yawan gajiya, mata masu ɗanyen ciki suna fama da yawan bacci. Duk da cewa har yanzu masana ba su gano takamaiman abin da ke sa mata yawan bacci a farkon shigar ciki ba, amma mafi rinjaye suna alaƙanta shi da hauhawar sinadarin progesterone a lokacin da mace ta dauki ciki

Waɗannan alamomi biyar da muka lissafa a sama sune manyan alamomin da ke nuna mace wadda tayi saduwa da namiji ta samu dacewa da shigar ciki. Haka zalika, mace zata iya fuskantar wasu ƙananan alamomi kamar haka:

Alamomin shigar ciki a satin farko

Shigar ciki a sati na ɗaya bai faye nuna alamomin komai ba, idan ma ya nuna, to mafiyawanci alamomi ne da basu keɓanci shigar ciki ba.

Yawan ɓacin rai: wannan yana faruwa ne saboda rashin daidaituwar sinadaran hormones da ke faruwa a lokacin da mace ta samu shigar ciki. Watarana mace kan iya yin har kuka ba tare da anyi mata komai ba, haka kewai ba gaira ba dalili.
Yawan kumburin ciki idan mace taci abinci da kuma fitar da iska.
Zuwan wani jini ɗan kaɗan daga gaban mace. Wannan jinin wasu mata sukan ɗauka kamar jinin al'ada ne, toh amma suna da bambanci sosai da jinin al'ada saboda bai kai jinin al'ada yawa ba kuma jinin al'ada yafi duhu da wari.
Ciwon mara matsakaici
Yawan jin ƙamshi ko warin abubuwa, ƙamshin wasu abubuwa yakan iya sa mace tayi amai duk da cewa ta saba jin ƙamshin ba tare da samun wata matsala ba.
Rashin jindaɗin abinci
Ko kuma kwaɗayin wasu kalolin abinci
Yawan toshewar hanci
Yawan zazzaɓi ko ciwon kai
Yawan taruwar yawu a baki
Ƙaruwar zubar ruwa a gaban mace
Fitar ƙuraje a fuska

Ya mace take gane tanada ciki?

Da farko idan mace ta san cewa lallai ta sadu da namiji ba tare da wata robar kariya ba kuma ta fara jin wasu alamomin da muka ambata a sama toh lallai dole ta fara zargin cewa ta samu ciki. Hanyoyin da mace za ta bi ta tabbatar da tanada ciki su ne kamar haka:

Mace zata iya fara yin awon ciki na fitsari tun a gida. Idan sakamakon ya nuna akwai ko babu sai taje asibiti ayi mata awon ciki na jini.
Idan an ga sakamakon awon ciki na jini ya nuna akwai ciki toh sai aje ayi hoton ultrasound domin tabbatar da cikin da aka samu da lafiyarshi
A ƙa'idar ilimin likitanci, ana tabbatar da cewa mace tana da ciki ne kawai idan anyi hoton ultrasound an ga hoton dan tayi a cikin mahaifar ta.

Kammalawa

A cikin wannan rubutu mun ga alamomin shigar ciki daban daban da ke iya nuna cewa mace tanada ciki. Haka kuma mun ga cewa waɗannan alamomin su kaɗai basu iya wadatarwa wajen tabbatar da mace tanada ciki har sai an je anyi hoton mahaifa an ga dan tayi a cikin mahaifarta.

Idan kuna da tambaya sai kuyi a cikin akwatin sharhi dake ƙasa, Insha Allah zamu karba ba tare da jinkiri ba. Haka kuma zaku iya shiga group dinmu na WhatsApp domin kasancewa damu damu a koda yaushe da kuma samun ingantattun bayanan mu a cikin sauki. Ku danna wannan domin shiga: Lafiyata Group 3.