Bayani game da kwanciyar aure da kuma yadda ake daukar ciki (Conception)

Gabatarwa:

Hukumar lafiya ta duniya (WHO) ta ƙiyasta cewa, duk bayan minti ɗaya aƙalla macce goma sha biyu (12) suna daukan ciki a ƙasar Nigeria. Kwanciyar aure ko kuma saduwa abu ne mai matuƙar muhimmanci a rayuwar ɗan adam domin ta wannan hanyar ne kaɗai jinsin ɗan Adam zai ci gaba da wanzuwa a doron kasa. Duk da cewa, a kimiyyance ana iya samun haihuwa ba tare da namiji da mace sun haɗu sun sadu da juna ba, watau ta hanyar da bature yake kira "in vitro fertilization", toh amma hanyar jima'i itace hanya ta asali kuma hanya mafi sauƙi da ɗan adam zai bi domin cigaba da samar da jinsin sa a doron ƙasa[¹].

Ba ɗorewar jinsi kaɗai ba, jima'i yana da amfani ga jikin ɗan adam kamar rage ƙishirwar sha'awa da ke damun samari da 'yan mata, inganta lafiyar ƙwaƙwalwa, ƙara ƙarfafa garkuwan jiki da kuma taimakawa wajen daidaita wasu sinadaran hormones a jikin mutum[¹].

Sassan jima'i a jikin ɗan adam

Sassan jima'i wasu gaɓoɓi ne a jikin mutum da ake amfani ko kuma suke taimakawa wajen yin jima'i. Waɗannan gaɓɓai sun bambanta tsakanin mace da namiji[¹].

Sassan jima'in namiji:

• Penis : Azzakari
• Testes :Ƴaƴan marina
• Scrotum : Fatar da ke ɗauke da ƴaƴan marina
• Urethra : Bututun da ke fitar da fitsari da ruwan maniyyi
• Prostate : Gland ne mai samar da wasu ruwa masu yauƙi
• Seminal vesicles : Gland ne mai samar da wasu ruwa masu kauri
• Epididymis: Wani bututu ne dake manne a bayan ya'yan marina, yana ajiye tantanin halittun haihuwa (ya'yan maniyyi) kafin lokacin inzali.
• Vas deference : Wani bututu ne da ke ɗauko tantanin halittun haihuwa daga epididymis zuwa tushen azzakari a yayin inzali.

Sassan jima'in mace

• Vagina : Farji
• Uterus : Mahaifa
• Ovaries : Gland ne dake samar da ƙwai a duk wata (month)
• Fallopian tubes: Bututun Fallopian wani bututu ne dake ɗaukar ƙwai daga ovaries zuwa cikin mahaifa
• Clitoris : Dan tsele ko kuma beli
• Labia majora : Laɓɓan farji manya
• Labia minora : Laɓɓan farji ƙanana
• Hymen : Tantanin budurci, yana fashewa da zarar aka fara jima'i da mace.

Yadda ake tsokano sha'awa

Sha'awar ɗan adam tana motsawa ne a lokacin da ƙwaƙwalwar sa ta karɓi wasu saƙonnin da zasu iya motsa masa sha'awa daga jakadun ta dake gangar jiki (idanu, kunne, hanci, baki da kuma jakadun ƙwaƙwalwa dake kan fata)[²]. Misali:

1. Idanu - mutum ya kalli wani abin da zai motsa masa da sha'awa, kamar kallon matarsa.

2. Kunne - mutum ya saurari wani abin da zai motsa masa sha'awa, kamar kalaman soyayya ko maganganun batsa.

3. Hanci - mutum ya shinshina wani abin da zai motsa masa sha'awa, kamar turaren matar sa, ko wani ƙamshi da ya saba ji a lokacin da yake jima'i ko yake cikin sha'awa.

4. Taɓi - mutum ya taɓa ko a taɓa masa wani wurin da sha'awar sa zata motsa. Jakadun fata zasu ɗauki saƙon zuwa ƙwaƙwalwar sa. Misali, sumbata, runguma da shafa jiki.

5. Baki - mutum yaci wani abinda ke motsa masa sha'awa. Ko kuma yaci abincin da matarsa ke yawan yi masa kamin suyi jima'i. A duk lokacin da yaci irin abincin zai iya jin sha'awar sa ta motsa.

6. Tunani - mutum ya kama tunanin saduwa ko tunanin matar sa ko tunanin batsa. Shima wannan yakan motsa sha'awar ɗan adam.

Me ke sa azzakarin namiji ya miƙe a lokacin sha'awa?

Da farko a duk lokacin da sha'awar ɗa namiji ta motsa ƙwaƙwalwar sa zata karkatar da samar da isasshen jini zuwa ga azzakarin sa. Azzakari yana ɗauke da jijiyoyin jini da wasu tsokoki na musamman waɗanda zasu iya ƙara tsawo kuma zasu iya ragewa. Cikar waɗannan jijiyoyin jini a lokacin da zuciya ta karkatar da samar da jini zuwa azzakari shi zai sanya azzakari ya miƙe kuma tsokar jikin sa tayi tauri[²].

Yadda namiji yake kawowa a lokacin jima'i

A lokacin da namiji ke yin jima'i yana shige-da-fice da azzakarinsa a cikin farji wasu jakadu dake jikin fatar azzakari zasu ɗauki taɓi da kuma gugar da fatar azzakari ke yiwa fatar farji a matsayin saƙon jindadi na musamman sannan su aikawa ƙwaƙwalwa.

Ƙwaƙwalwar ɗan adam ita zata fassara wannan saƙo a matsayin wani jin dadi na musamman sannan ta fara fitar da wasu sindaran hormones. 

A yayin da jindadin ya kai ƙololuwa, ƙwaƙwalwar namiji zatayi umurni ga tantanin halittun haihuwa (sperm cells) da ke cikin kwararon epididymis da su kama hanya zuwa cikin azzakari. 

Daga nan zasu kama hanyar su ta cikin vas deference har zuwa tushen azzakari, a yayin da suka zo tushen azzakari daga nan zasu haɗu da wani ruwa da prostate gland ke fitarwa mai yauƙi da kuma wani ruwa mai kauri wanda seminal vesicles ke samarwa. 

Waɗannan abubuwan guda uku (tantanin halittun haihuwa da suka taso daga epididymiys zuwa tushen azzakari, ruwan da prostate gland ke fitarwa da kuma ruwan da seminal vesicles ke fitarwa) su ne zasu gauraye su fito ta hanyar azzakari a matsayin ruwan maniyyi lokacin fa namiji yake kawowa ko kuma yin inzali.

Waɗannan ruwan maniyyin da namiji yake kawowa a lokacin jima'i suna ɗauke da tantanin halittun haihuwa da zasu kai kimanin miliyan talatin da tara zuwa miliyan ɗari biyu(39 - 200 millions) ga lafiyayyen namiji. Ko wane ɗaya daga cikin wadannan miliyoyin tantanin halittun zai iya samar da ciki (juna biyu) idan ya haɗu da ƙwan tantanin halitta ɗaya da macce ke kawowa a duk wata.[²][³].

A lura cewa, a lokacin da namiji yake cikin ƙaramar sha'awa kamin ya fara jima'i ko lokacin da ya ke tunanin saduwa, ko yayin wasa da matar sa yakan iya samun wasu ruwa marar kauri suna fito masa daga azzakari (ruwan da ake kira maziyyi da Hausa), waɗannan ruwan gland ɗin prostate ne kawai ba tare da maniyyi ba, su ruwan maniyyi basa fitowa sai a lokacin babbar sha'awar lokacin da namiji yake kawowa, kuma da sun gama fita sha'awar zata karye[³].

Yadda ake tsokano sha'awar budurwa ko duk wata mace

Ana tsokano sha'awar mace ta hanyar yin wasa da ita da kuma shafa mata sassan jima'inta waɗanda munka ambata a baya. A lokacin da sha'awar mace ta motsa ƙwaƙwalwar ta zatayi umurni ga zuciyarta domin ta samar da isasshen jini zuwa ga al'aurar ta. Samar da wannan isasshen jini zuwa al'aura zai sa al'aurar mace ta kumbura kuma tayi jaa sosai. 

Haka zalika ƙwaƙwalwarta zata yi umurni ga wasu glands da ke cikin mahaifarta su fara samar da wasu ruwa masu yauƙi, waɗannan ruwan sune zasu gangara zuwa farjinta domin su samar da ni'ima, da santsi a lokacin da fatar azzakari ke taɓa fatar farji. Waɗannan ruwan suna ƙaruwa sosai a duk lokacin da sha'awa da kuma jin daɗin jima'in da mace keyi ya ƙaru[¹][²].

Yadda mace ke kawowa idan taji dadin jima'i 

A lokacin da mace ta kai ƙololuwar jindadin jima'i, ƙwaƙwalwar ta takan yi umurni da fitar da waɗancan ruwan da muka ambata a sama dayawa, fitar da wadannan ruwan da yawa shi ake kira da kawowar mace ko inzalin mata ko fitar ruwan maniyyin mata. Haka kuma fitar wannan ruwan yana kai maƙura ne a lokacin da mace ta kai maƙurar jindadin jima'i.

Amma a lura cewa, waɗannan ruwan da mace ke kawowa a lokacin da ake jima'i da ita har yanzu suna wani babi na mahawara ga masana ilimin kimiyyar ɗan adam. Amma bisa ga magana mafi inganci ruwan da mace ke kawowa basu da wata alaƙa da tantanin halittun haihuwar da take bada gudunmawa domin daukar ciki. Saɓanin ruwan maniyyin da namiji ke kawowa daga azzakarinsa a lokacin jima'i, su ruwan maniyyin da mace ke kawowa daga farjinta aikinsu kawai shi ne samar da ni'ima da santsi da kuma inganta jindaɗin saduwa. 

Tunda abin ya zama haka, nasan mai karatu zai so yasan yanda mace ke bada gudunmawa domin samun ciki[²][³].

Ya mace ke bada gudunmawa wajen samun ciki (juna biyu)?

Mace tana bada gudunmawa ne ta hanyar samar da wani ƙwai dake fitowa daga ovaries dinta. A duk wata (month) mace tanayin ƙwai a cikin ovaries nata wanda yana samuwa ne a tsakiyar watan ta na al'ada. Hakan zai yi dai dai da rana ta goma ko ta sha ɗaya zuwa ta sha huɗu bayan tayi tsarki daga jinin al'ada. A lura cewa fitar da wannan ƙwai baya da alaƙa da yin jima'i. Har matan da ba'a taɓa yin jima'i dasu ba duk wata sai sunyi wannan ƙwai in dai sun balaga sun fara jinin al'ada[¹][³].

Yadda ake daukar ciki (shigar ciki a jikin mace)

A duk lokacin da mace tayi ƙwai ta fitar dashi ya kan fito daga ovaries dinta zuwa mahaifarta. Idan ta samu nasarar yin jima'i a lokacin da ƙwan yake da rayuwa (ƙwan ya kan ɗauki kwana biyu zuwa uku kamin ya mutu) har ruwan maniyyin namiji suka zuba a cikin farjin ta, toh tantanin halittun haihuwar da ke cikin ruwan maniyyin namiji zasuyi rigaye domin suje cikin mahaifarta su sadu da ƙwan domin a samu ciki. Daga tantanin maniyyin namiji ɗaya ya haɗu da ƙwan mace shikenan sauran zasuyi haƙuri. Daga nan kuma maniyyin namiji da kuma ƙwan mace zasu haɗu su zama ciki sannan su ci gaba da girma a cikin mahaifa har zuwa haihuwa[³].

Illolin jima'i ko saduwa a jikin mutum

Duk da cewa jima'i yana da amfani a jikin mutum amma yawan yin jima'i barkatai kuma yakan haifar da wasu illoli a jiki. Manyan illolin sun haɗa da;

1. Kamuwa daga cututtukan da ake iya samu ta hanyar jima'i

2. Yawan mantuwa

3. Jin ciwo yayin jima'i

4. Raguwar ruwan maniyyi

Bayanin rufewa

Jima'i abu ne mai matuƙar muhimmanci a jikin ɗan adam, a cikin wannan rubutu munyi tsokaci sosai game da falsafar jima'i a kimiyyance. Munyi bayanai tun daga yanda sha'awa take farawa har zuwa ɗaukan juna biyu. Duk mai tambaya sai yayi ta a cikin akwatin sharhi dake ƙasan wannan rubutu. Insha'Allah zamu karɓa masa.

Nassoshi

1. Human reproductive system

2 Female reproductive system by Mycleveland Clinic

3. Shtarkshall RA, Carmel S, Jaffe-Hirschfield D, Woloski-Wruble A. Sexual milestones and factors associated with coitus initiation among Israeli high school students. Arch Sex Behav. 2009 Aug;38(4):591-604. doi: 10.1007/s10508-008-9418-x. Epub 2008 Dec 18. PMID: 19093197.

Print this post