Amfanin Yin Haihuwa Ko Nakuda A Asibiti

Amfanin Yin Haihuwa Ko Nakuda A Asibiti — Jan Hankali

A nan ƙasashen mu na Arewa, yawanci mata na haihuwa ne a gida, wasu da taimakon unguzoma, wasu kuma tare da taimakon ‘yan uwa. Amma gaskiyar magana ita ce, ba kowace haihuwa ce ake iya yin ta lami lafiya a gida ba. Domin wasu matsaloli na iya tasowa ba tare da tsammani ba, kuma idan ba a cikin asibiti, rayuwar uwa ko jariri na iya shiga hadari.

Rubutu Mai Alaka: Meke Kawo Jinkirin Zuwan Ruwan Nono Bayan Haihuwa

Abin da wasu ba su gane ba shi ne, duk haihuwa tana iya zuwa da matsala, ko da kuwa mace tana cikin ƙoshin lafiya. Haihuwa a gida na iya kawo matsaloli kamar zubar jini mai yawa, cututtukan mahaifa, ko kuma haihuwar da jariri ba zai iya fita da sauƙi ba. Idan babu kayan aikin ceto a kusa, wannan na iya haifar da matsaloli masu tsanani.

Babu wanda zai iya cewa unguzoma ba su da amfani, domin suna taimaka wa mata da dama a wajen haihuwa. Amma idan mace ta ga cewa ciwo na ƙaruwa fiye da yadda ya kamata, ko kuma ta fuskanci wahala fiye da haihuwar da ta yi a baya, toh yana da muhimmanci a tafi asibiti. A asibiti, akwai jami'an lafiya da kayan aiki da za su taimaka idan wata matsala ta taso.

Idan ba a samu damar zuwa asibiti ba, yana da kyau a haɗa kai da jami’an lafiya da ke kusa domin su duba lafiyar uwa da jariri bayan haihuwa. A wasu lokuta, matsalolin da ba a iya ganewa a gida za a iya gane su a asibiti, kamar cututtuka da ke iya shafar jariri ko mahaifa.

Lafiya ita ce abu mafi muhimmanci a jikin dan adam. Ko dai a gida ko a asibiti, abu mafi muhimmanci shi ne a tabbatar da cewa akwai ƙwararru da za su taimaka idan wata matsala ta taso. Kar mu dogara da cewa “haka ake yi tun a da” kawai—mu tabbatar da cewa ana samun haihuwa cikin aminci, domin rayuwa dai ba ta da madadi.