Illolin Maganin Zubar Da Ciki Ga Budurwa

Gabatarwa

Maganin zubar da ciki (abortion pills) yana daga cikin hanyoyin da ake amfani da su a ɓoye musamman tsakanin matasa da budurwai domin zubar da ciki ko guje wa ɗaukar ciki da ba a shirya ba. Amma, duk da cewa wannan maganin yana iya zubar da ciki, yana tattare da illoli masu tsanani ga lafiyar mace musamman budurwa wadda jikinta bai gama balaga ko jure irin wannan mummunan haɗari ba.

A cikin wannan rubutu, za mu tattauna dalla-dalla kan illolin maganin zubar da ciki ga budurwa, haɗari da matsalolin da kan iya biyo baya, tare da ba da shawarwari kan hanyoyin kariya da guje wa irin wannan hatsari. Wannan bayani zai taimaka wajen wayar da kai, musamman ga matasa mata, iyaye, da al’umma baki ɗaya.

Menene Maganin Zubar Da Ciki?

Maganin zubar da ciki wani sinadari ne da ake amfani da shi don zubar da ciki ta hanyar kawo budewar bakin mahaifa tare da yunkurin mahaifa na bankado duk abinda ke cikinta zuwa waje, wanda hakan zai tilasta tayin fita daga jikin uwa. 

Rubutu Mai Alaka: Illolin Hanyoyin Zubar Da Ciki Ga Lafiyar Mace Bayan Abortion 

Wannan magani yawanci ba a samun sa cikin sauƙi a asibiti a ƙasashe da dama saboda dokoki, amma ana amfani da shi a ɓoye. Wannan yasa budurwai da dama ke amfani da shi ba tare da shawara ko kulawar likita ba, wanda hakan ke jawo matsaloli masu dimbin yawa da tsanani.

Illolin Maganin Zubar Da Ciki Ga Budurwa

1. Zubar Jini Mai Yawa

Budurwa da ke amfani da maganin zubar da ciki tana fuskantar haɗarin zubar jini fiye da kima. Wannan zubar jini kan wuce ƙima har ya jawo rashin lafiya, karancin jini, suma, ko mutuwa idan ba a samu kulawa da wuri ba.

2. Raunin Mahaifa (Uterus Injury)

Maganin zubar da ciki kan haifar da rauni a cikin mahaifa. Wannan zai iya lalata mahaifar mace ya kuma sa budurwa ta rasa ikon samun haihuwa nan gaba.

3. Kamuwa Da Kwayoyin Cuta (Pelvic Infection)

Idan aka yi amfani da maganin ba tare da tsafta irin ta asibiti da kulawa ba, cututtuka kamar sepsis ko pelvic inflammatory disease (PID) na iya shiga jikin budurwa. Wannan cuta tana da matuƙar hatsari ga lafiyar mace.

4. Rashin Haihuwa Nan Gaba (Infertility)

Illolin maganin zubar da ciki na iya kaiwa ga toshewar bututun haihuwa (fallopian tubes) ko lalacewar mahaifa, wanda hakan zai iya hana budurwa samun ciki gaba ɗaya a nan gaba.

5. Ciwon Ƙirji da Ƙugu

Maganin yana iya kawo ciwon ƙirji, ƙugu da ciki saboda sauyin hormone da kuma yunkurin mahaifa. Wannan ciwo yawanci yana tsananta ga budurwai saboda jikinsu bai saba irin wannan mummunan sauyi ba.

6. Damuwa da Matsalolin Hankali

Illolin ba wai na jiki kawai ba ne. Budurwa da ta yi amfani da maganin zubar da ciki kan shiga cikin damuwa (depression), tsoro, bakin ciki, da tsoron rashin samun aure ko haihuwa nan gaba.

7. Rikicin Jinin Haila

Bayan amfani da maganin zubar da ciki, budurwa na iya samun matsaloli wajen jinin haila. Wasu kan fuskanci haila mara tsari ko kuma daina ganin jinin al’ada gaba ɗaya saboda lalacewar mahaifa.

Karin Bayani: Bayanin jinin haila mai wasa da kuma matsalolin rikicewar jinin al'ada - (Disorders of menses)

8. Haɗarin Mutuwa

A mafi muni, rashin sanin yadda ake amfani da maganin zubar da ciki na iya jawo mutuwar budurwa saboda zubar jini mai yawa, raunin mahaifa, ko kamuwa da cuta.

Wasu Dalilan Da Yasa Budurwai Kan Yi Amfani da Maganin Zubar da Ciki

1. Rashin samun tarbiyyar kwarai daga iyaye.
2. Tsoron asarar soyayya ko aure.
3. Tsoron kunya daga iyaye ko al’umma.
4. Rashin samun isasshen ilimi game da family planning.
5. Rashin samun damar kula da lafiya.
6. Matsin lamba daga iyaye ko abokin soyayya.

Rubutu Mai Alaka: Yadda ake Zubar da Ciki a Nigeria: Dokokin Kasa da na Addinin Musulunci

Yadda Za a Guji Illolin Maganin Zubar Da Ciki

1. Nemi Shawarar Likita – Kada ki yi amfani da magani a ɓoye ba tare da kulawar kwararren likita ba.

2. Family Planning – Yin amfani da hanyoyin kariya kamar robar kondom, allura, IUD da dai sauransu domin gujewa daukar cikin da ba a shirya ba.

3. Wayar da Kai – Iyaye da malamai su ba matasa ilimi kan illolin maganin zubar da ciki da kuma mahimmancin tsare kai daga samun cikin da bashi da asali.

4. Kare Kai daga Fyade ko Tilastawa – A koyaushe budurwa ta nemi taimako idan aka tsinci kai cikin hatsari ko matsin lamba.

5. Taimakon Addu'a da Addini – Yin amfani da addu'o'i da shawarwari domin rage tsoro da matsin lamba da kan jawo irin wannan yanke shawara.

Kammalawa 

Illolin maganin zubar da ciki ga budurwa sun fi muni fiye da abin da ake tsammani. Ba wai kawai yana iya jawo lalacewar mahaifa da rashin haihuwa ba, har ma zai iya haifar da matsalolin kwakwalwa da mutuwar budurwa. Wannan yasa yana da matuƙar muhimmanci a wayar da kai tsakanin matasa, iyaye da al’umma gaba ɗaya.

Mafi kyawun hanya ita ce gujewa daukar cikin da ba a shirya ba ta hanyar amfani da hanyoyin kariya da neman shawara daga likitoci. Wannan zai kare lafiyar mace, ya kuma ba ta damar samun makoma mai kyau a gaba.

Fannin Mata